Sjálfsmorð eftir upptöku á ástarfundi

Átján ára gamall bandarískur háskólanemi framdi sjálfsmorð eftir að tvö skólasystkini hans tóku myndir af ástarfundi hans með öðrum karlkyns nemanda.

Skólasystkinin skildu eftir falda myndavél í herbergi nemandans. Þau notuðu svo spjallforrit sem kallast iChat til þess að koma myndunum á framfæri en á iChat er hægt að senda myndbands upptökur í beinni útsendingu.

Háskólaneminn hét Tyler Clementi. Þegar hann frétti af þessu lokaði hann fésbók sinni með orðunum: -Stekk fram af gw brúnni. Harma þetta.

Tvö vitni sáu hann svo stökkva fram af George Washington brúnni í New York. Lík hans fannst fljótlega.

Myndatökufólkið var handtekið og verður leitt fyrir rétt.