Daily Mirror: Capello mun funda með Terry og Bridge

Daily Mirror greinir frá því í dag að landsliðsþjálfarinn Fabio Capello hjá Englandi muni velja bæði John Terry og Wayne Bridge í landsliðshóp sinn fyrir vináttulandsleikinn gegn Egyptalandi á Wembley-leikvanginum í næstu viku.

Capello ætlar að nota tækifærið til að fá leikmennina til þess að sættast í eitt skipti fyrir öll eftir fjaðrafokið í fjölmiðlum þegar upp komst um framhjáhald Terry með barnsmóður og fyrrum kærustu Bridge.

„Bridge er ekki hættur með landsliðinu og er því líklegur til þess að fara á lokakeppnina. Ég mun hins vegar ganga úr skugga um það að það sé ekkert vandamál á milli hans og Terry.

Ég er ekki búinn að tala við þá báða þar sem mér leiðist að tala í síma ég vil frekar gera þetta með þá báða fyrir framan mig," sagði Capello í vitðali við Daily Mirror en hann tilkynnir landsliðshópinn fyrir leikinn gegn Egyptalandi á laugardag.

Sama hvernig fer þá munu Terry og Bridge verða í sviðsljósinu á laugardaginn þegar Chelsea og Manchester City mætast í ensku úrvalsdeildinni.