170 yfirheyrðir vegna bankahrunsins

Sérstakur saksóknari hefur tekið skýrslur af 170 einstaklingum vegna bankahrunsins en þar af njóta 40-50 einstaklingar stöðu sakbornings en það gæti hæglega breyst.

Þetta kom fram í svari Rögnu Árnadóttur, dómsmálaráðherra á Alþingi fyrir stundu en það var Sigmundur Ernir Rúnarsson, þingmaður Samfylkingarinnar sem bar upp fyrirspurn um stöðu rannsóknar sérstaks saksóknara.

Þá kom einnig fram að 60 mál hafa borist til sérstaks saksóknara. Þar af hafa 17 málum verið vísað frá. Alls hefur sérstakur saksóknari ráðist í 50 húsleitir á Íslandi, Lúxemborg og Bretlandi.

25 starfsmenn vinna hjá embættinu en búast má við að þrír starfsmenn til viðbótar bætist við hópinn á næstu mánuðum. Þá nýtur embættið liðsinnis 7 erlendra sérfræðinga.

Í svari dómsmálaráðherra kom einnig fram að embætti sérstaks saksóknara býst við gríðarlega mörgum málum til viðbótar sem gætu borist frá FME og skattstjóra.

Einnig var spurt hvenær rannsóknum gæti verið lokið en dómsmálaráðherra gat ekki svarað því. Heimild er í lögum til þess að sameina embættið ríkissaksóknara árið 2011 en Ragna sagði að það væri afar ólíklegt að slíkt myndi gerast í bráð.