Lilja hafnar ásökunum Jóhannesar

Lilja Mósesdóttir, formaður viðskiptanefndar Alþingis, segist ekki skilja hvað Jóhannesi Jónssyni gangi til með bréfi til sín sem hann sendi jafnframt þrettán öðrum þingmönnum, en þar sakar hann Lilju um að grafa undan mannorði sínu. Það kannast hún ekki við.

Eins og fréttastofa greindi frá í gærkvöldi segist Jóhannes Jónsson kaupmaður í Bónus í bréfi sem stílað er á Lilju Mósesdóttir upplifa í annað sinn pólitískar ofsóknir á hendur sér. Hann sendi bréfið á alla nefndarmenn í viðskiptanefnd og fleiri þingmenn. Tilefni bréfsins eru orð sem Lilja lét hafa eftir sér og sneru að Högum og aðkomu fyrri eigenda félagsins að því.

Lilja segist ekki skilja bréf Jóhannesar, enda segist hún ekki hafa nafngreint Jóhannes sérstaklega í umfjöllun sinni um Haga. Hún hafnar því að hafa vegið að mannorði Jóhannesar.

Lilja segist hafa haldið því fram að skipta eigi Högum upp, en hún telur að fleiri fjárfestar hafi þá bolmagn til að bjóða í fyrirtækin. Hún segist telja að Jóhannes hljóti að vera sammála sér í ljósi þess að Arion banki hafi tekið yfir Haga því þá séu væntanlega meiri líkur á að Jóhannes geti boðið í Bónus og eignast fyrirtækið á ný.

Hún segist hafa fengið skilaboð um að hringja í Jóhannes, en í þeim hafi verið rangt símanúmer. Hún segist áskilja sér frest til að svara bréfi Jóhannesar formlega. Auk þess segir hún að sér finnist afar skrýtið að bréf sem stílað hafi verið á hana hafi verið sent á aðra þingmenn.