Ríkisendurskoðandi hafnar bullbrigslum

Sveinn Arason ríkisendurskoðandi gerir athugasemdir við ummæli Álfheiðar Ingadóttur, fyrrverandi heilbrigðisráðherra, í Fréttablaðinu á laugardag. Þar lýsti Álfheiður ummælum Ríkisendurskoðunar í skýrslu um framkvæmd fjárlaga yfirstandi árs sem „bulli“.

Í skýrslunni segir Ríkis­endur­skoðun að óraunæf krafa um sparnað hafi verið sett á Sjúkratryggingar Íslands. Meðal annars hafi skort samvinnu sérfræðilækna um verulega lækkun gjaldskrár og leiðsögn heilbrigðisráðuneytis­ins til að tryggja að tilætlaður sparnaður næðist. Álfheiður benti á að það hafi verið Alþingi sem tók ákvörðun um sparnaðinn en ekki heilbrigðisráðuneytið.

„Þótt Alþingi fari formlega með fjárstjórnarvald ríkisins hafa ríkis­stjórn og ráðherrar frumkvæði að gerð fjárlaga. Þeir bera ábyrgð á þeim tillögum sem lagðar eru fyrir þingið í formi fjárlagafrumvarps,“ segir Sveinn Arason.

Ríkisendurskoðandi bendir á að í fjárlagafrumvarpi fyrir árið 2010 hafi það verið heilbrigðisráðuneytið sem lagði til að fjárveiting vegna þjónustu sjálfstætt starfandi sérfræðilækna yrði 4,3 milljarðar króna, eða 29 prósentum minna en á árinu 2009 þegar kostnaður­inn hafi orðið rúmir sex milljarðar. Þessa tillögu ráðuneytisins hafi Alþingi samþykkt. Nú stefni í að kostnaður ársins verði um 5,9 milljarðar króna eða 37 prósent umfram fjárlög.

„Það er rétt hjá fyrrverandi heil­brigðis­ráðherra að formlega var það Alþingi sem gerði sparnaðar­kröfuna í fjárlögum ársins 2010. Engu að síður lagði heilbrigðisráðuneytið grunn að kröfunni og tillögu um hana í fjárlagafrumvarpinu. Þá ber það ábyrgð á framkvæmd kröfunnar eftir að þingið lagði blessun sína yfir hana,“ segir Sveinn og ítrekar það sem kemur fram í skýrslunni, að ráðuneytinu hafi verið fullljóst við fjárlagagerð haustið 2009 að sparnaðarkrafan næðist ekki fram nema sérfræðilæknar féllust á að lækka gjaldskrá sína mjög mikið. Því hafi verið óraunhæft að setja kröfuna fram, auk þess sem skort hafi skýra stefnumótun og leiðsögn af hálfu ráðuneytisins.

„Í ljósi þessa er Alþingi í skýrslunni hvatt til að fara vandlega yfir forsendur niðurskurðartillagna í fjárlagafrumvarpi fyrir árið 2011 og kanna hvort þær séu raunhæfar. Ég vil nota tæki­færið og árétta þessa hvatningu hér,“ segir Sveinn.

Ögmundur Jónasson, sem var heilbrigðisráðherra fram að þeim tíma að fjárlagafrumvarpið var lagt fram, segir frumvarpið ekki hafa verið frágengið fyrr en með samþykkt Alþingis í desember.

gar@frettabladidi.is