Birna: Hæpið að skattleggja bankana frekar á óvissutímum

Birna Einarsdóttir, bankastjóri Íslandsbanka og formaður Samtaka fjármálafyrirtækja, segir að sérstakur eignaskattur á bankanna geti skapað þeim mikil vandræði, taki skatturinn ekki mið af rekstrarniðurstöðu. Skatturinn gæti haft alvarleg áhrif á eiginfjárhlutfall þeirra og gert það að verkum að einhverjir bankar færu niður fyrir lágmarks eiginfjárkröfur Fjármálaeftirlitsins.

Samfylkingin vinnur að því að koma á sérstökum bankaskatti til að sauma í stórt fjárlagagat ríkissjóðs sem myndaðist í kjölfar bankahrunsins. Tvær leiðir eru færar til að skattleggja bankanna frekar: Tekjuskattur eða skattur á eignir, að því er Magnús Orri Schram, þingmaður Samfylkingarinnar, sagði við Vísir.is í gær. Hagnaður þeirra væri jafnframt skattlagður.

„Það er mjög hæpið að leggja sérstakan skatt á rekstrarhagnað bankanna umfram það sem gert er í dag þar sem uppgjör þeirra eru ennþá nokkuð bjöguð vegna gengis- og verðtryggingaráhrifa á tekjuhlið þeirra," segir Birna við Vísir.is.

Hún segir að óvissan í rekstrarumhverfi bankanna sé ennþá mjög mikil og slík skattlagning væri því varhugaverð þar sem sterkar fjármálastofnanir eru ein grunnforsenda endurreisnarinnar.

„Varðandi hugmyndir um sérstakan eignaskatt á bankanna þá gæti það valdið mjög alvarlegri niðurstöðu fyrir þá að fá á sig eignarskatt sem ekki tæki mið af rekstrarlegri niðurstöðu. Í slíku tilviki gæti það haft alvarleg áhrif á eiginfjárhlutfall þeirra og gert það að verkum að einhverjir þeirra færu niður fyrir lágmarks eiginfjárkröfur FME sem er 16%. Þá hljóta menn að velta fyrir sér hvort það samræmist samkeppnissjónarmiðum og Evrópureglum að skattleggja eina atvinnugrein sérstaklega umfram aðrar með þessum hætti. Einnig er hætt við að kostnaði sem af þessu hlytist yrði að lokum velt yfir til lánþega og viðskiptavini fjármálafyrirtækjanna þar sem þau þurfa að standast arðsemiskröfur," segir Birna.

Hún segir að gert sé ráð fyrir að fjármálafyrirtæki landsins greiði samtals um 14 milljarða króna í það heila í ýmis opinber gjöld fyrir árið 2009 og áætlað er að þær greiðslur nemi 17 milljörðum króna fyrir árið 2010. Inni í þessum tölum eru tekjuskattsgreiðslur, tryggingagjald, fasteignagjöld, eftirlitsgjald og greiðslur til Tryggingarsjóðs innstæðueigenda, sem tvöfaldast á þessu ári, segir Birna.