Magnús Orri: Umtalsverðar fjárhæðir með bankaskatti

Tvær leiðir eru færar í hinum svokallaða „bankaskatti" sem Samfylkingin hefur hug á að koma á: Tekjuskattur eða skattur á eignir, að sögn Magnús Orra Schram, þingmanns Samfylkingarinnar. Hagnaður bankanna væri jafnframt skattlagður.

Aðspurður hversu háar fjárhæðir hann vilji sækja úr bönkunum með þessu segir hann að ekki hægt að svara því. „Ég er hinsvegar að tala um umtalsverðar fjárhæðir. Ég vil að það sé á hreinu," segir þingmaðurinn í samtali við Vísir.is

Magnúsi Orra þykir álitlegast að leggja á fjármálastofnanir sérstakan tekjuskatt sem taki mið af stærð þeirra. Smærri fjármálastofnanir yrðu skattlagðar minna en þær stærri. Skatturinn væri sem sé þrepaskiptur.

Hann segir að með hinni leiðinni, að skattleggja eignir svo sem innstæður, sé hægt að sækja verulega fjármuni til stærstu bankanna.

Þá sé jafnvel hægt að hægt að smíða skattkerfið þannig að það fylgi ákveðnum viðmiðum í rekstrinum, þá væri til dæmi horft til arðsemi bankans.

„Bankaskatturinn hefur ekki verið útfærður nánar í okkar hópi. Við viljum leggja hann inn í fjárlagagerðina," segir hann.

„Mér finnst það tvíbent," segir hann spurður hvort það komi til greina að skattleggja launa bankamanna sérstaklega og bendir á að þeir séu þegar skattlagðir með tekjuskatti. „Þeir sem eru með yfir milljón eru að borga verulega af þeirri upphæð í skatt."

Magnús Orri segir að hvatinn að þessum nýja skattinn sé bágstaða ríkisins eftir bankahrunið sem og að bankarnir hafi ekki aðstoðað skuldsett heimili jafn mikið og þingmenn hefðu viljað. Hann áréttar að enn sé ríkisábyrgð á öllum innstæðum.

Bankarnir eru vel aflögufærir, að hans sögn. Árið 2009 var hagnaður Arion banka, Landsbanka og Íslandsbanka samtals 51 milljarður króna. Arðsemi eigin fjár var allt að 30%. Fyrstu þrjá mánuði ársins hagnaðist Landsbankinn um 8 milljarða.

Þórunn Sveinbjarnardóttir, þingmaður Samfylkingarinnar, sagði á Alþingi í gær að Samfylkingin vildi taka upp sérstakan bankaskatt. Magnús Orri lagði það til á þinginu í síðustu viku.