Ferguson: Ryan Giggs verður með á móti Liverpool um næstu helgi

Ryan Giggs verður búinn að ná sér af meiðslum sínum þegar Manchester United mætir Liverpool í stórleik ensku úrvalsdeildarinnar um næstu helgi. Velski vængmaðurinn handleggsbrotnaði í leik á móti Aston Villa 10. febrúar síðastliðinn og er því búinn að vera í meira en mánuð í burtu.

„Ryan verður klár fyrir Liverpool-leikinn. Hann er búinn að standa sig frábærlega á æfingum," sagði Sir Alex Ferguson, stjóri Manchester United á blaðamannafundi fyrir leikinn á móti Fulham sem fram fer á sunnudaginn.

„Hann fær nýja hlíf í dag og við munum síðan fá ferskari Giggs til baka sem er mjög gott fyrir okkur," segir Ferguson um hinn 36 ára gamla Ryan Giggs.

„Við erum búnir að reyna að finna það út í allan vetur hvaða leiki væri best fyrir hann að spila svo að álagið yrði ekki of mikið. Nú kemur hann ferskur til baka eftir mánaðarhvíld," sagði Ferguson.