Uprennandi stjórnmála- og listamenn litu við hjá lögreglunni

Það var líf og fjör á lögreglustöðvum í umdæmi lögreglunnar á höfuðborgarsvæðinu í dag líkt og á mörgum vinnustöðum.

Fjölmargir hressir krakkar litu við og tóku lagið, lögreglumönnum til óblandinnar ánægju. Eins og jafnan á öskudegi höfðu krakkarnir farið í skrautlega búninga og mátti sjá margar persónur úr heimi kvikmynda- og skemmtanaiðnaðarins.

Stjórnmálamenn voru líka í þessari fjölbreyttu flóru en bæði Jóhanna forsætisráðherra og Steingrímur fjármálaráðherra litu við á lögreglustöðinni í Kópavogi í morgun. Í frétt á vef lögreglunnar kemur fram að Jóhanna sagði í sífellu að hennar tími myndi koma og veifaði jafnframt Icesave-plaggi ótt og títt. Minna fór fyrir Steingrími sem hafði meðferðis fulla tösku af fjármunum!

Þau Jóhanna og Steingrímur tóku lagið ásamt tveimur stjörnum úr skemmtanabransanum en fjórmenningarnir sungu svo vel að eftir var tekið.