Gerrard kaupir uppáhaldsveitingastaðinn sinn

Leikmenn Liverpool virðast ekki hugsa um mikið annað en mat þessa dagana en Vísir greindi frá því í gær að Fernando Torres vildi vera með sinn eigin matreiðsluþátt.

Þar ætlaði hann að skora á Steven Gerrard og Jamie Carragher í matreiðslukeppni. Torres ætlaði þá að útbúa ljúffenga Tapas-rétt. Stakk hann jafnvel upp á sérstöku HM-þema þar sem leikmenn sem flestra landsliða myndu taka þátt.

Í dag berast síðan þau tíðindi að Steven Gerrard hafi ákveðið að kaupa uppáhaldsveitingastaðinn sinn sem er í Stockport.

Veitingastaðurinn er vel þekktur enda þykir maturinn á staðnum vera hið mesta lostæti.

„Þetta er uppáhaldsstaðurinn minn og ég er búinn að borða þarna í mörg ár," sagði Gerrard.

Staðurinn heitir Warehouse Brasserie en Gerrard og félagar ætla að breyta staðnum sem og nafninu í Warehouse Kitchen & Bar.