Ungabörn sofa lengur vegna súrefnisskorts

Súrefnisskortur gæti verið ástæða þess hversu vært íslensk börn sofa úti við í vögnunum sínum. Þetta segir forstöðumaður Forvarnarhúss.

Að láta ungbörn sofa úti við hefur tíðkast hér á landi frá tímum baðstofa og ungbarnadauða og kom til vegna lélegra húsakynna. Einnig voru berklar landlægir og þá var „hreina útiloftið" talið hafa góð áhrif.

„Síðan þá höfum við lært mjög mikið í millitíðinni og samkvæmt heilbrigðisleiðbeiningum almennt, bæði hér á landi og í öðum löndum, þá er ekki mælt með því að börn séu sett út til að sofa í frosti," segir Herdís Storgaard, forstöðumaður Forvarnarhúss.

Til að verja krílin gegn frosti og kuldablæstri þá er iðulega gripið til þess að hylja opið á vagninum með teppi, úr flís eða prjónaefni. Eina rannsóknin sem vitað er til að hafi verið gerð á þeim gjörningi var súrefnismæling framkvæmd af verkfræðingi í fæðingarorlofi.

„Og hann sagði að ef að ég væri að koma inn á vinnustað og súrefnismælingin væri þetta þyrfti ég að loka viðkomandi vinnustað. Þannig að við mælum alls ekki með því að fólk sé að byrgja vagnanna," segir Herdís.

Þótt sett sé spurningamerki við að útisvefninn leiði til hreysti og styrki lungun þá er það engu að síður reynsla fjölda foreldra að börnin sofa værar og lengur úti við.

„En það er kannski líka út af því að súrefnisprósentan er ekki sérstaklega holl og þess vegna sefur barnið lengur," segir Herdís.