Segir draugagang í gamla hersjúkrahúsinu á varnasvæðinu

„Við höfum fengið tvær fyrirspurnir en engar formlegar tilkynningar," segir Magnús Skarphéðinsson forseti Sálarrannsóknarfélags Reykjavíkur og sérfræðingur í yfirskilvitslegum fyrirbærum, en tveir aðilar hafa sett sig í samband við hann vegna draugagangs á hersjúkrahúsinu að Ásbrú í Reykjanesbæ.

Athafnamaðurinn Róbert Wessman hyggst breyta sjúkrahúsinu í lúxus-sjúkrahús fyrir útlendinga en á spítalanum verða framkvæmdar liðaskipta- og offituaðgerðir. Þarna hafa verið hlutir á hreyfingu og greinilegur umgangur," segir Magnús um gamla herspítalann.

Hann segir tilvikið skráð hjá Sálarrannsóknarfélaginu. Um er að ræða eitt herbergi sem virðist áberandi reimt í. Að sögn Magnúsar hefur hann ekki kannað aðstæður sjálfur og því þekki hann ekki vel til hvar nákvæmlega í húsinu draugagangurinn á sér stað.

„Mín ágiskun er sú, þar sem þetta var hersjúkrahús, að í þessu húsi hafi margt gerst sem varðar líf og dauða margra einstaklinga. Reimleikinn tengist greinilega fólki sem hefur látið lífið þarna," segir Magnús.

Aðspurður segist Magnús fá tvær til þrjár tilkynningar á viku um draugagang. Hann segir raunveruleg tilvik komi í það minnsta á tveggja vikna fresti.

„Í síðustu viku hringdi kona og kom hingað til okkar. Það var mikill umgangur í húsinu hennar auk þess sem það var bankað á útidyrnar," segir Magnús en raunir konunnar voru talsverðar þar sem draugurinn virðist hafa lagt hendur á hana auk þess sem hann dró gluggatjöldin frá í tíma og ótíma.

„Hún var að horfa á sjónvarpið þegar það var skyndilega tekið utan um kinnarnar á henni, ekkert ólíkt og fullorðið fólk gerir við börn," segir Magnús um drauginn en eins og oft áður þá er tilgangur andans óljós.