Danir og Svíar þrýsta enn á Íslendinga vegna Icesave

Norðurlöndin eru reiðubúin til þess að hjálpa Íslandi út úr efnahagskreppunni. Skilyrðin eru þó þau að Ísland nái samkomulagi um Icesaveskuldina, segja utanríkisráðherrar Norðurlandanna eftir sameiginlegan fund þeirra í Kaupmannahöfn í dag.

„Við viljum hjálpa Íslandi að koma hjólum efnahagslífsins af stað að nýju. Þannig að Ísland fær nýtt upphaf," sagði Lene Espersen, utanríkisráðherra Danmerkur, í samtali við Ritzau fréttastofuna.

„Það er ekki vafi um að samkomulag milli Íslands og Hollands mun greikka leiðina að lánum frá hinum Norðurlöndunum og Alþjóðagjaldeyrissjóðnum," sagði Carl Bildt, utanríkisráðherra Svíþjóðar. Jonas Gahr Støre, utanríkisráðherra Noregs, segir hins vegar að lán frá Noregi séu ekki háð lausn Icesave samkomulagsins.

Á fundinum gagnrýndi Össur Skarphéðinsson utanríkisráðherra orð fjármálaráðherra Svía, sem segir að það sé ómögulegt að halda þjóðaratkvæðagreiðslu um það hvort menn ætli að standa við skuldbindingar sínar. Össur sagði að það væri alls ekki ætlun Íslendinga að hlaupast brott frá skuldbindinum sínum og furðaði sig á því að fjármálaráðherrann væri haldinn slíkum ranghugmyndum.