Erlendir miðlar segja Íslendinga hlaupa frá skuldum sínum

Ákvörðun forseta Íslands vekur heimsathygli og sjónvarpsstöðvar eins og SKY og BBC hafa gert henni ítarleg skil. Ísland neitar að endurgreiða Bretlandi, sagði SKY News, en þessi tónn var áberandi í breskum og norrænum miðlum; að Íslendingar ætli ekki að standa við skuldbindingar sínar. Helstu fjármálamiðlar kafa ofan um málið, eins og Financial Times og Wall Street Journal.

Danskir fjölmiðlar eru einna neikvæðastir í garð Íslendinga; Ísland neitar að greiða reikninginn fyrir bankahrunið, Ísland hleypur frá breskri bankaskuld, sagði Börsen. Netmiðill Berlingske Tidende sagði að Ísland gæti endað sem fjárhagslegur útkjálki í heiminum. Ákvörðun forsetans gæti steypt Íslandi oní í efnahagslegt svarthol.

Neita að borga kreppuskuld, var ein fyrirsögn netmiðils Verdens Gang í Noregi. Ábyrgðarlaus ákvörðun af hálfu Íslands, var einnig sagt, og staðhæft að verulega hefði dregið úr líkum á aðild landsins að Evrópusambandinu.

Reuters-fréttastofan hafði eftir háttsettum finnskum embættismanni að norrænum lánum til Íslands yrði líklega seinkað, og sá sagði að Bretar og Hollendingar yrðu spurðir um næstu skref, og erlendir miðlar segja margir að Ísland horfist nú augu við enn verri kreppu en áður.