Góð þátttaka í skoðanakönnun um sameiningu

Góð þátttaka var í skoðanakönnun bæjarstjórnar Álftanes á hug íbúa til sameiningar sem haldin var samhliða þjóðaratkvæðagreiðslunni um Icesave um helgina. Fram kemur á vef sveitarfélagsins að þátttakan var í samræmi þátttökuna í atkvæðagreiðslunni en endanlegur fjöldi verður kynntur samhliða niðurstöðum skoðanakönnunarinnar á morgun.

Í könnuninni gafst íbúum kostur á að tjá hug sinn til þess annars vegar hvort viðkomandi væri hlynntur því að Álftanes sameinist öðru sveitarfélagi og hins vegar ef til sameiningar kæmi hvaða sveitarfélagi viðkomandi teldi ákjósanlegast að sameinast.

„Bæjarstjórn vill koma á framfæri við íbúa þökkum fyrir þátttöku sína í skoðanakönnuninni en bæjarstjórn taldi sér bæði rétt og skylt að kanna hug íbúa til sameiningar," segir á vef sveitarfélagsins.