Dómstjóri býst við fjölda riftunarmála

Helgi Ingólfur Jónsson, dómstjóri í Héraðsdómi Reykjavíkur, segir að eftir metfjölda einkamála í fyrra þyngist enn róðurinn hjá dómstólum.

„Það má reikna með að nú fari að streyma inn mál út af kröfum í þrotabú bankanna. Þau geta skipt hundruðum,“ segir Helgi og vísar til þess að hátt í þrjátíu þúsund kröfur hafi borist í þrotabú stóru bankanna; Glitnis, Kaupþings og Landsbankans. Mörgum kröfum hafi slitastjórnir hafnað eða muni hafna.

„Þá geta kröfuhafar borið það undir dómstóla og það má reikna með að þessum málum fari mjög fjölgandi á næstu mánuðum.“

Að sögn Helga eru þegar í gangi um þrjátíu mál kröfuhafa í Straumi-Burðarási auk alls konar mála vegna gjaldþrota stórra fyrirtækja. „Síðan má reikna með verulegum fjölda mála sem skiptastjórar höfða til riftunar á ýmsum gerningum. Þá er sérstakur saksóknari búinn að boða fyrstu málin í vor þótt það verði ekki stærstu málin. Þau munu koma seinna og verða gríðarlega stór og flókin,“ segir Helgi.

Um síðustu áramót hækkuðu þingfestingargjöld hjá dómstólum allverulega. Gjaldið var áður 3.900 krónur en varð eftir hækkun á bilinu 15.000 til 90.000 krónur eftir fjárhæð þeirrar kröfu sem stefnendur gera. Ætlunin er sú að þeir peningar sem þannig fást til viðbótar renni til þess að auka við mannafla hjá dómstólunum. Helgi segir að auglýst hafi verið eftir fimm nýjum dómurum sem starfa eigi í Reykjavík, Hafnarfirði og Selfossi og að bætt hafi verið við aðstoðarmönnum. Lögmenn telja hins vegar að mikil hækkun þingfestingargjalda fæli suma frá að leita til dómstóla.

„Ég hef heyrt að það sé umræða meðal lögmanna um það að þeir hiki við að leggja mál fyrir dómstóla,“ játar Helgi. „Kröfuhafarnir verða alltaf að leggja út fyrir kostnaði þannig að það þarf að vega það og meta hvort mál séu til árangurs fallin; hvort að skuldarinn geti borgað. En það má benda á að fimmtán þúsund krónur ná ekki einum tíma á lögmannsstofu. Í hinu stóra samhengi myndi maður telja að þetta væri ekki sú fjárhæð að hún ætti að ráða úrslitum um það hvort menn leggi mál fyrir dómstóla.“

gar@frettabladid.is