Við sprengjum ykkur í loft upp

Norður-Kóreumenn segjast reiðubúnir að sprengja bæði Suður-Kóreu og Bandaríkin í loft upp. Þeir létu þessi huggulegu ummæli falla við upphaf 11 daga sameiginlegrar heræfingar bandamannanna.

Um 18 þúsund bandarískir hermenn taka þátt í æfingunum og ótilgreindur fjöldi suður-kóreskra hermanna. Tilgangurinn er að æfa hvernig bandaríski herinn myndi bregðast við stríðsástandi á Kóreuskaganum.

Norðanmenn segja hinsvegar að þetta sé undirbúningur undir árás innfyrir sín landamæri. Þeir hafa skipað eigin herafla í viðbragðsstöðu.

Um 28.500 bandarískir hermenn eru staðsettir í Suður-Kóreu.