Hugnast hugmyndir um þjóðaratkvæði varðandi sjávarútveginn

Eygló Harðardóttir, þingmaður Framsóknarflokksins, segir að hugmynd forsætisráðherra um að setja fiskveiðistjórnunarkerfið næst í þjóðaratkvæðagreiðslu sé athyglisverð.

Jóhanna Sigurðardóttir, forsætisráðherra, segir í samtali við Fréttablaðið í dag að deilur um núverandi kerfi hafi klofið þjóðina í áratugi og að ríkisstjórnin hafi einsett sér að leiða þær deilur til lykta. „Það færi vel á því að mínu mati, að niðurstaða sáttanefndarinnar, sem nú er að störfum um málið, yrði lögð fyrir þjóðina."

Eygló segir í pistli á heimasíðu sinni að sterkur og öflugur sjávarútvegur skipti öllu máli fyrir Ísland og framtíð landsins. „Ég er hins vegar komin á þá skoðun að það verði aldrei sátt um fiskveiðistjórnunarkerfið, enda hagsmunirnir gífurlegir. Kannski er eina lausnin að kjósa um mismunandi kerfi?"