Thierry Henry telur Arsenal geta unnið deildina

Thierry Henry, fyrrum framherji Arsenal, segir að sitt gamla félag geti vel unnið ensku úrvaldsdeildina án lykilmannsins Robin Van Persie. Arsenal hefur færst nær toppsætinu og er nú aðeins tveimur stigum á eftir Manchester United sem situr á toppi deildarinnar.

„Ég tala í hreinskilni þegar ég segi að Arsenal geti unnið deildina og hef haldið því fram síðan að deildin byrjaði," sagði Henry við News of the World.

„Ég vildi óska þess að ég vissi að þeir myndu gera það með sóknarmann sem gæti skorað tuttugu mörk eða meira á tímabilinu. Ef Robin Van Persie hefði ekki meiðst fyrir jól, hver veit hvað hefði gerst þá? Með mann eins og hann í hópnum mætti ætla að liðið krækti í sex eða sjö stig," sagði Henry.

Henry talar einnig um hvað það væri stórkostlegt ef að Arsenal næði að vinna deildina með svo ungan leikmannahóp.

„Ef að Arsene Wenger nær að vinna titilinn á þessu tímabili með svona ungan hóp þá væri það frábært. Wenger hefur svo oft verið gangrýndur fyrir sín vinnubrögð en hann vill gera hlutina á sinn hátt sem er ekki vitlaust," sagði Henry.

Arsenal mætir Porto í seinni leik liðanna í næstu viku og hefur Henry engar áhyggjur af sínum gömlu félögum.

„Ég vill ekki vera með óvirðingu við neinn en ég tel Arsenal-liðið allt of sterkt fyrir Porto," sagði Henry að lokum.