Samninganefndin í viðbragðsstöðu

Íslenska Icesave samninganefndin undir forystu Lee Bucheit fór til Bretlands í morgun og bíður þar í viðbragðsstöðu, óski Bretar og Hollendingar eftir frekari viðræðum. Engir fundir hafa verið ákveðnir, segir Elías Jón Guðjónsson, talsmaður fjármálaráðuneytisins.

Heimildir fréttastofu herma að nefndin hafi haldið utan að kröfu Breta og Hollendinga. Það fæst ekki staðfest. Hollendingar og Bretar gerðu Íslendingum tilboð um lyktir málsins. Stjórn og stjórnarandstaða sammæltust um að svara tilboðinu með þeim hætti að óska eftir frekari viðræðum.