Kynna skýrslu um leigu á vatns- og jarðhitaréttindum í eigu ríkisins

Nefnd um fyrirkomulag leigu á vatns- og jarðhitaréttindum í eigu ríkisins hefur lokið störfum og verður skýrsla nefndarinnar kynnt á morgun.

Í lok maí 2008 samþykkti Alþingi lög um breytingu á ýmsum lögum á auðlinda- og orkusviði þar sem að mestu var bannað að selja vatnsréttindi í eigu opinberra aðila. Í bráðabirgðaákvæði er kveðið á um að forsætisráðherra skuli skipa nefnd til að fjalla um fyrirkomulag varðandi leigu á vatns- og jarðhitaréttindum í eigu ríkisins. Nefndin skuli í störfum sínum fjalla um leigugjald, leigutíma, endurnýjun leigusamninga og önnur atriði er lúta að réttindum og skyldum aðila. Þá skuli nefndin meta hverra aðgerða sé þörf til að tryggja sjálfbæra og hagkvæma nýtingu auðlindanna.

Í nefndinni sem skipuð var í ársbyrjun 2009, áttu sæti Karl Axelsson, hrl. og dósent, formaður; Elísabet Sigurðardóttir, lögfræðingur úr forsætisráðuneyti, Friðrik Már Baldursson, prófessor, Þórunn Pálsdóttir, verkfræðingur, Hafsteinn S. Hafsteinsson, lögfræðingur úr fjármálaráðuneyti, Lúðvík Bergvinsson, hdl., tilnefndur af iðnaðarráðherra, og Guðlaug Jónsdóttir, lögfræðingur úr sjávarútvegs- og landbúnaðarráðuneyti, en Arnór Snæbjörnsson, lögfræðingur úr sama ráðuneyti, tók síðar hennar sæti í nefndinni.

Skýrsla nefndarinnar verður kynnt á fundi í Þjóðmenningarhúsinu á morgun klukkan 10:30. Fundurinn er ætlaður fréttamönnum og öðrum sem áhuga hafa á málefninu.