Moyes: Erum nógu gott lið til þess að halda Rodwell

Knattspyrnustjórinn David Moyes hjá Everton hefur aðvarað þau lið sem hafa miðjumanninn efnilega Jack Rodwell undir smásjánni því hann segir leikmanninn ekki vera á förum.

Rodwell hefur meðal annars verið orðaður við Englandsmeistara Manchester United sem keyptu einmitt Wayne Rooney frá Everton á sínum tíma en Moyes segir félagið nú miklu betur í stakk búið til þess að halda efnilegustu leikmönnum hjá félaginu.

„Rodwell er búinn að vera mikið á milli tannanna á fólki og það er kannski ekkert skrýtið. Hann er mjög efnilegur leikmaður sem hefur alla burði til þess að ná langt. Ég er hins vegar ekkert smeykur við að missa hann frá Everton. Ég var miklu smeykari með Wayne Rooney á sínum tíma því þá var Everton bara í fallbaráttu og ekki jafn gott lið og við erum í dag.

Núna erum við nógu gott lið til að halda leikmanni eins og Rodwell," sagði Moyes í viðtali við breska fjölmiðla í dag.