Óska eftir því að ráðuneytið skoði hæfi Halldórs

Bæjarráð Kópavogs samþykkti á fundi sínum í gær að óska álits samgöngur- og sveitastjórnaráðuneytisins á hæfi Halldórs Jónssonar sem skoðunarmanns reikninga Kópavogsbæjar.

Þessi ákvörðun bæjarráðs var tekin eftir að fréttist af því að Halldór hafi verið í miklum viðskiptum við Kópavogsbæ. Um síðustu helgi var upplýst í fjölmiðlum að Halldór hafi fengið rúmlega sjötíu milljónir króna frá bænum fyrir ýmis hönnunar-og eftirlitsstörf á árunum 2003 til 2008. Ekkert þessara verka var boðið út.

Halldór er skoðunarmaður reikninga bæjarins fyrir hönd Sjálfstæðisflokksins og gefur umsögn um þá sem fulltrúi meirihlutans.