Redknapp: Woodgate hugsanlega ekki meira með á tímabilinu

Knattspyrnustjórinn Harry Redknapp hjá Tottenham hefur staðfest að varnarmaðurinn Jonathan Woodgate eigi enn langt í land með að ná sér af þeim meiðslum sem hafa verið að plaga hann undanfarið.

Woodgate á við þrálát nárameiðsli að stríða sem hafa orðið til þess að hann hefur aðeins leikið þrjá leiki til þessa á tímabilinu.

„Woodgate verður hugsanlega ekki meira með á tímabilinu. Ég vona innilega að hann geti spilað eitthvað en eins og staðan er núna er mjög erfitt að segja af eða á. Læknarnir eru enn að reyna að finna nákvæmlega hvað gerir það að verkum að þetta tekur svona langan tíma en við vonum það besta," sagði Redknapp á blaðamannafundi í dag.

Woodgate eygði von um að blanda sér í baráttuna um sæti í landsliðshópi Englands fyrir lokakeppni HM næsta sumar en nú virðist það vera borin von fyrir þennan sterka varnarmann.