Halldór rukkaði Kópavogsbæ nokkrum árum eftir verklok

Verkin sem Halldór Jónsson verkfræðingur vann fyrir Kópavogsbæ og Fréttablaðið greindi frá á laugardag tengjast sjö framkvæmdum í bænum á árabilinu 2003 til 2008.

Alls er um 64 reikninga að ræða upp á 71,5 milljónir króna, Þar af eru fjórir upp á átján milljónir fyrir þrjú aðskilin verk sem greiddir voru 9. desember 2008. Samkvæmt heimildum Fréttablaðsins gaf Halldór út nokkra reikninganna sem skoðunarmaður Kópavogs.

Halldór er einn af helstu trúnaðarmönnum Gunnars I. Birgissonar, fyrrverandi bæjarstjóra, og var formaður fulltrúaráðs Sjálfstæðisflokksins í Kópavogi frá 1986 til 2003. Líkt og og Fréttablaðið greindi frá kom umfang viðskiptanna Gunnsteini Sigurðssyni, bæjarstjóra í Kópavogi, á óvart. „Ég vissi að hann hafði verið í einhverjum verkum, en ég gerði mér enga grein fyrir umfanginu.“ Gunnsteinn hefur kallað eftir upplýsingum frá tæknideild bæjarins um hvernig hafi verið staðið að vali á verktökum í umræddum verkum.

Samkvæmt sveitarstjórnarlögum mega bæjarstarfsmenn ekki vera skoðunarmenn sveitarfélaga. Trausti Fannar Valsson, lögfræðingur og sérfræðingur í stjórnsýslurétti, segir að hvað verktaka varði skipti umfang verkefnanna máli og það hve viðvarandi þau eru. Ekki hafi reynt á hvort verktakagreiðslur hafi gert menn vanhæfa sem skoðunarmenn.

„Ég held að þó ekki hafi reynt á þetta, þá sé ekki opið á það að maður geti verið skoðunarmaður sveitarfélags alveg óháð því hversu mikil verkefni maður tekur að sér fyrir það.“

Guðríður Arnardóttir, bæjarfulltrúi Samfylkingarinnar í Kópavogi, ætlar að skoða reikninga Halldórs í dag. Þar á meðal verksamninga. „Mér sýnist í sumum tilvikum sem reikningar hafi verið greiddir fyrir verk sem lauk tveimur árum fyrr. Það er mjög sérstakt,“ segir hún.

Ómar Stefánsson, bæjarfulltrúi Framsóknarmanna, segir einstaka reikninga ekki koma inn á borð bæjarstjórnar. „En Halldór hefur að mínu mati farið illa með það traust sem honum var sýnt. Ég mun ekki styðja hann áfram sem skoðunarmann,“ segir Ómar.

Ekki náðist í Halldór Jónsson í gær.

jonab@frettabladid.is

kolbeinn@frettabladid.is