Vændiskonum kennt að nota hjartastuðtæki

Hóruhús í Sviss eru byrjuð að kenna vændiskonum sem þar starfa að nota hjartastuðtæki til þess að koma í veg fyrir ótímabær andlát viðskiptavina sinna.

Eigandi hóruhúss í Lugano í Sviss lenti í því á dögunum að eldri borgari fékk hjartaáfall í miðjum klíðum. Slíkt er þó langt því frá eindæmi heldur hafa fjölmargir karlmenn gripið um handlegginn í miðjum samförum og jafnvel látist í kjölfarið á hóruhúsum í héraðinu.

Þess vegna brá eigandi hóruhússins á það ráð að kenna gleðikonunum á hjartastuðtæki ef allt færi á hinn versta veg. Sjálfur rökstyður hann nýjungina á þeim forsendum að andlát manna á hóruhúsum séu fyrst og fremst slæm fyrir viðskiptin.

Heilbrigðisyfirvöld á svæðinu eru sögð styðja framtakið og þá helst í ljósi þess að hjartastuðtæki séu orðin það einföld og því sé auðveldlega hægt að nota þau við þessar lífshættulegu aðstæður ef svo má að orði komast.