Cahill frá vegna meiðsla í þrjár vikur

Knattspyrnustjórinn David Moyes hjá Everton hefur staðfest að miðjumaðurinn öflugi Tim Cahill verði líklega frá vegna meiðsla næstu þrjár vikur.

Cahill meiddist á ökkla í 2-1 sigri Everton gegn Sporting í fyrri leik liðanna í 32-liða úrslitum í Evrópudeild UEFA á Goodison Park-leikvanginum í vikunni.

„Tim verður frá í þrjár vikur líklega en meiðslin eru ekki alvarlega. Það kæmi mér reyndar á óvart ef hann yrði lengur frá en í tvær vikur," sagði Moyes á blaðamannafundi í dag en ljóst er að Cahill verður ekki með í deildarleikjum gegn Manchester United og Tottenham og seinni leiknum gegn Sporting.