Bjarni: Mjög ánægður með samninganefndina

„Ég er afar sáttur við störf samninganefndarinnar. Ég tel að við höfum komist að skynsamlegri niðurstöðu hér heima fyrir um þau skilaboð sem átti að færa Bretum og Hollendingum. Nefndin hefur staðið sig sérstaklega vel í því að útskýra okkar málstað," segir Bjarni Benediktsson, formaður Sjálfstæðisflokksins.

Forystumenn stjórnmálaflokkanna funduðu í forsætisráðuneytinu í morgun með íslensku samninganefndinni sem undanfarna daga hefur dvalið í London og fundað með hollenskum og breskum embættismönnum. Nefndarmenn komu heim í gærkvöldi en tilgangur ferðarinnar var að sannfæra Breta og Hollendinga um að hefja nýjar samningaviðræður um Icesave.

„Ef það dugar ekki til þess að leiða fram niðurstöðu þá vil ég að við fellum þessa samninga sem voru afgreiddir í lok síðasta árs. Þá er ljóst það er ekkert samkomulag í gildi við Breta og Hollendinga. Það er ekki vegna þess að við höfum ekki sýnt sanngirni heldur vegna þess að þeir hafa verið með óbilgjarnar kröfur. Við eigum ekki að tapa ró okkar yfir því," segir Bjarni.