Stjórnvöld eyði óvissu vegna úreltra prentlaga

Stjórn Blaðamannafélags Íslands skorar á stjórnvöld að eyða réttaróvissu vegna úreltra prentlaga. Stjórnin vekur athygli á að Hæstiréttur Íslands þyngdi í gær dóm yfir Erlu Hlynsdóttur, blaðamanni DV, vegna ummæla sem höfð eru eftir viðmælanda í frétt blaðsins.

Erla þarf að greiða Helgu Haraldsdóttur, eiginkonu Guðmundar Jónssonar í Byrginu, 400 þúsund krónur í bætur vegna ummæla sem höfð voru eftir Ólöfu Ósk Erlendsdóttur um Helgu í DV í ágúst 2007. Áður hafði Héraðsdómur Reykjavíkur dæmt Erlu til að greiða Helgu 100 þúsund krónur í bætur.

„Fyrir liggur skýr vilji löggjafans í nýlegu frumvarpi um að samræma prentlög og útvarpslög að þessu leyti og tryggja að viðmælendur beri sinn hluta ábyrgðarinnar. Blaðamannafélagið hefur ásamt útgáfufélagi DV vísað slíku máli til Mannréttindadómstóls Evrópu," segir í ályktun frá stjórn Blaðamannafélagsins.

„Það hindrar tjáningarfrelsi og setur vinnubrögð blaðamanna í vandasömum málum í uppnám að hægt sé að gera blaðamenn ábyrga fyrir ummælum viðmælenda. Á því verður að ráða bót."