Tapaði 200 þúsund krónum á því að vinna meiðyrðamál

Hæstiréttur Íslands staðfesti dóm Héraðsdóms Reykjavíkur þar sem eiginkona Guðmundar Jónssonar, oft kenndur við Byrgið, Helga Haraldsdóttir fór í meiðyrðamál við blaðamann DV, Erlu Hlynsdóttur.

Helga vildi ógilda fjórtán ummæli í grein sem Erla skrifaði árið 2007 vegna Byrgismálsins svokallaða.

Héraðsdómur Reykjavíkur komst að því að eingöngu tvö ummæli væru meiðyrði. Hæstiréttur kemst hinsvegar að þeirri niðurstöðu að eingöngu ein ummæli flokkist undir meiðyrðalöggjöfina en það voru ummælin: „... ekki við hæfi að sú sem veiðir fyrir hann vinni við grunnskóla."

Ummælin voru hinsvegar hluti af lengri setningu en fyrri hlutinn þótti ekki brjóta í bága við meiðyrðalöggjöfina.

Athygli vekur að þrátt fyrir að hæstiréttur mildar í raun dóm héraðsdóms þá eru miskabætur, sem Erla þarf að greiuða Helgu hækkaðar úr hundrað þúsund krónum upp í fjögur hundruð þúsund.

Þá vekur ennfremur athygli að Helgu er gert að greiða málskostnað Ólafar Óskar Erlendsdóttur og Magnúsar Einarssonar, sem hún stefndi einnig fyrir meiðyrði. Alls þarf hún greiða 600 þúsund krónur vegna þessa.

Því tapar Helga í raun tvöhundruð þúsund krónum á sigrinum.