Minni verðmæti en í fyrra

Heildarafli íslenskra fiskiskipa, metinn á föstu verðlagi, í janúar 2010 var 8,9 prósent minna en á sama tíma í fyrra. Þetta kemur fram á vef Hagstofu Íslands.

Umtalsvert færri tonn voru veidd í ár, en þá komu 55.445 tonn á land. Í janúar 2009 nam sama tala 71.520 tonnum. Mest er veitt af botnfiski, um 31.300 tonn sem er 1.700 tonnum minna en í fyrra. Athygli vekur að meira veiddist af þorski í ár en í fyrra, 17.400 tonn nú en 15.700 þá. Afli uppsjávartegunda nam rúmum 22.000 tonnum í ár, 14.500 tonnum minna en í fyrra. Skýrist það helst af minni síldveiði, í janúar 2009 veiddust 18.500 tonn af síld en aðeins 6.400 í ár. - kóp