Sjö umsóknir í forvali nýs Landspítala

Alls bárust sjö umsóknir í forvali vegna hönnunarsamkeppni nýs Landspítala og eru allar stærstu verkfræðistofur landsins meðal þátttakenda. Forvalsnefnd metur nú umsóknirnar og verður tilkynnt eftir viku hvaða teymi öðlast þátttökurétt í hönnunarsamkeppninni.

Ábyrgðaraðilar hönnunarteymanna sjö sem skiluðu inn umsóknum í forvalinu eru Mannvit hf., TBL Arkitektar ehf., VSÓ Ráðgjöf, Efla hf., Verkís hf., Almenna verkfræðistofan hf. og Guðjón Bjarnason. Frestur til að skila inn umsóknum rann út klukkan tvö í dag.

Engar athugasemdir voru gerðar við framkvæmd forvalsins þegar niðurstöðurnar voru kynntar í dag en Gunnar Svavarsson, formaður verkefnisstjórnar nýs Landspítala, tilkynnti við það tækifæri að forvalsnefnd verkefnisstjórnarinnar myndi skila niðurstöðum sínum eftir viku, að fram kemur í tilkynningu. Valin verði allt að fimm teymi til þátttöku í hönnunarsamkeppninni og verði keppnislýsingin tilbúin 5. mars næstkomandi. Skilafrestur í hönnunarsamkeppninni er í byrjun júní 2010 og úrslit eiga að liggja fyrir mánuði síðar, eða í byrjun júlímánaðar.

Hönnunarsamkeppnin tekur til áfangaskipts skipulags lóðar Landspítala við Hringbraut og útfærslu á 66 þúsund fermetra nýbyggingu þar. Áætlað er að framkvæmdir við nýja spítalann geti hafist á síðari hluta árs 2011 og standi fram á árið 2016. Áætlaður kostnaður við nýbygginguna er um 33 milljarðar króna á verðlagi í mars 2009.