Kínverjar ráðast á Thorbjörn Jagland

Kínverskir ríkisfjölmiðlar gera persónulegar árásir á Thorbjörn Jagland, formann norsku nóbelnefndarinnar. Kínverjar eru í mikilli geðshræringu yfir því að andófsmaðurinn Liu Xiaobo fékk friðarverðlaun Nóbels í ár.

Kínverjar tína það til að Barack Obama fékk Nóbelsverðlaunin í fyrra. Jagland hafi þar verið að smjaðra fyrir Bandaríkjunum en sýni Kína aftur fjandskap með því að veita ótíndum glæpamanni verðlaunin.

Í leiðara eins dagblaðsins segir þannig: Jagland og kumpánar hans hafa ítrekað notað Nóbelsverðlaunin sem pólitískt verkfæri. Blaðið segir einnig að hroki Jaglands og fordómar breyti því ekki að miklar framfarir hafi orðið í Kína í átt til lýðræðis og mannréttinda.