Vill hætta við þjóðaratkvæðagreiðsluna

Valgerður Bjarnadóttir, þingmaður Samfylkingar, vill að hætt verði við fyrirhugaða þjóðaratkvæðagreiðslu um Icesave lögin um næstu helgi þar sem viðsemjendur Íslands hafi lagt fram gagntilboð.

„Það er alveg ljóst að það liggur eitthvað á borðinu sem er innan gæsalappa betra heldur en þessi samningur sem við eigum að kjósa um," sagði Valgerður í Silfri Egils í dag. „Ég sé ekki af hverju við ættum að fara að kjósa um þetta í næstu viku."

Aftur á móti sagði Ásmundur Daði Einarsson, þingmaður VG, að eðlilegast væri að þjóðaratkvæðagreiðslan fari fram næstkomandi laugardag. Alþingi hefði sett lög um atkvæðagreiðsluna sem allir þingmenn hefðu samþykkt. Ásmundur sagði mikilvægt að landsmenn sýni þjóðaratkvæðagreiðslunni virðingu og mæti og greiði atkvæði. Þannig styrkist samningsstaða Íslands.