Smástelpur pískaðar -flúðu gamla eiginmenn -myndband

Tvær afganskar smástelpur þrettán og fjórtán ára voru pískaðar opinberlega eftir að þær náðust aftur á flótta frá miklu eldri eiginmönnum.

Mannréttindasamtök smygluðu myndbandi af pyntingunum úr landi. Stelpurnar dulbjuggu sig sem stráka og tókst að dyljast í tvo daga áður en lögreglumaður kom auga á þær.

Þær voru sendar aftur heim til eiginmannanna sem bjuggu í afskekktu smáþorpi í Ghor héraði.

Þar voru þær dæmdar til hýðingar fyrir abrot sín. Klerkurinn sem dæmdi þær tók sjálfur að sér hýðinguna.

Hann barði svo fast að hann varð uppgefinn og afhenti öðrum manni pískinn. Honum þótti sá ekki slá nógu fast þannig að hann hrifsaði aftur til sín pískinn og hélt áfram að berja.

-Vel gert herra múlla, segir svo einn viðstaddra þegar hýðingunni lýkur. Og svo safnast menn til bæna.