Kemur til greina hjá Kanu að spila með Portsmouth

Umboðsmaður sóknarmannsins Nwankwo Kanu segir að hann sé nú að fara yfir tilboð frá Portsmouth og að til greina komi að spila með félaginu í ensku B-deildinni á næstu leiktíð.

Portsmouth hefur átt í miklum fjárhagslegum erfiðleikum og féll úr ensku úrvalsdeildinni í vor.

„Við höfum fengið samningstilboð og eru viðræður nú í gangi," sagði umboðsmaðurinn við enska fjölmiðla í dag. „Hann hefur hingað til spilað í deild þeirra bestu en er opinn gagnvart því að spila í neðri deild."

Portsmouth er nú í greiðslustöðvun og skiptastjórinn Andrew Andronokou hefur rætt um að enginn leikmaður fái hærri laun en tíu þúsund pund á viku.

„Peningar hafa aldrei skipt Kanu höfuðmáli," sagði umboðsmaður hans. „Við skiljum vel afstöðu skiptastjórans."

Kanu mun spila með Nígeríu á HM í Suður-Afríku sem hefst á föstudaginn.