Hodgson hefur trú á eigin getu

Roy Hodgson hefur enn trú á getu sinni sem knattspyrnustjóri þrátt fyrir slæmt gengi Liverpool í upphafi leiktíðar.

Hodgson var ráðinn til Liverpool í sumar eftir að hafa náð frábærum árangri með Fulham.

En Liverpool hefur gengið skelfilega í haust og er nú í fallsæti ensku úrvalsdeildarinnar eftir að hafa tapað, 2-1, fyrir Blackpool á heimavelli um helgina.

„Mér var mikið hampað í maí og ég tel ekki að ég hafi tapað neinum hæfileikum þremur mánuðum síðar," sagði Hodgson í samtali við enska fjölmiðla í dag.

„Ég veit að þessi spurning mun verða borin upp en ég tel að fólk sem hefur verið lengi í boltanum ætti að spyrja hennar. Við vitum öll að maður á sín góðu augnablik og slæmu í fótboltanum."

„Ég naut frábærs augnabliks í maí og hér í byrjun október er augnablikið slæmt."

„En ég tel ekki að ég hafi skyndilega breyst eða tapað einhverjum þeim hæfileikum sem hafa þjónað mér svo vel sem þjálfari undanfarin 35 ár."