Van der Sar framlengir samning sinn við United

Manchester United hefur staðfest að markvörðurinn gamalreyndi Edwin van der Sar sé formlega búinn að skrifa undir nýjan samning við félagið sem haldi honum á Old Trafford-leikvanginum fram á sumar árið 2011.

Van der Sar verður því orðinn fertugur þegar samningur hans rennur út en hann hefur litlar áhyggjur af því.

„Mér líður bara vel og skrokkurinn er í fínu standi. Ég nýt þess líka mjög að spila fótbolta fyrir þetta frábæra félag og ég stefni á að bæta fleiri titlum í safnið á þessum tíma," sagði van der Sar í viðtali á opinberri heimasíðu United.