Wenger: Ég vona innilega að Marwijk hafi rétt fyrir sér

Knattspyrnustjórinn Arsene Wenger hjá Arsenal er ekki jafn bjartsýnn og landsliðsþjálfarinn Bert van Marwijk hjá Hollandi þegar kemur að endurkomu Robin Van Persie.

Marwijk lét hafa eftir sér nýlega að Persie myndi pottþétt snúa aftur í byrjun apríl en Wenger var áður búinn að gæla við að geta notað Persie aftur í fyrsta lagi um miðjan mánuðinn.

„Ég vona innilega að Marwijk hafi rétt fyrir sér en mér þykir hann nú vera einum of bjartsýnn ef hann heldur að Persie verði klár í slaginn í byrjun apríl.

Ég hef reyndar ekki séð Persie í nokkurn tíma þar sem hann er í endurhæfingu í Hollandi en eftir því sem mér skilst þá á hann enn smá í land með að ná sér," sagði Wenger í viðtali við Sky Sports fréttastofuna en Persie er búinn að vera frá vegna ökkla meiðsla síðan í nóvember.