Árni Sigfússon: Ekki kom til greina að leita til eftirlitsnefndarinnar

Bæjarstjóri Reykjanesbæjar segir að ekki hafi komið til álita að leita til eftirlitsnefndar með fjármálum sveitarfélaganna vegna vanskila bæjarins.

Reykjanesbær er í vanskilum með erlent lán upp á 1,8 milljarða króna en lánið féll í gjalddaga í byrjun ágúst. Morgunblaðið greindi frá þessu í dag. Eftirlitsnefnd með fjármálum sveitarfélaga hafði sent bænum viðvaranir vegna slæmrar fjárhagsstöðu en nefndin vissi hins vegar ekki um vanskilin.

„Það vissi eftirlitsnefndin ekki um og það kom okkur mjög á óvart," segir Kristján Möller, samgönguráðherra. Ráðherra segir að ráðuneytið hafi engar heimildir til að grípa inn í að eigin frumkvæði. „Samkvæmt lögum og reglugerðum er það þannig. Sjálfstæði sveitarfélaga er það mikið."

Í sveitastjórnarlögum segir að bæjarstjórn eigi að tilkynna það til eftirlitsnefndar sjái hún fram á vanskil. „Það hefur nú ekki komið til greina að leita til eftirlitsnefndar um þetta mál," segir Árni Sigfússon, bæjarstjóri Reykjanesbæjar. Árni segist hafa vonað að það tækist að endurfjármagna lánið og ekki sé útilokað að það takist að semja við lánveitandann.



Höfðu trú á auknum umsvifum í Helguvík

Í fjárhagsáætlun bæjarins var gert ráð fyrir að tekjur myndu aukast um sjö hundruð milljónir króna í ár, einkum vegna umsvifa í Helguvík.

„Ef við hefðum ekki trú á þessu verkefni og við værum ekki að sýna raunverulega í okkar áætlunum að við gerðum ráð fyrir að þetta verkefni færi af stað þá þá veit ég ekki hver ætti að gera það," segir Árni aðspurður hvort um um raunhæfa áætlun hafi verið að ræða.

Fólk fái almennilega vinnu

Skuldir Reykjanesbæjar nema um 400% af árstekjum. Vilji er fyrir því að koma 150% þaki á skuldir sveitarfélaga, en unnið er að endurskoðun sveitarstjórnarlaga.

Spurður hvernig vinda eigi ofan af fjárhagsstöðunni segir Árni: „Með því að fólk fái almennilega vinnu, í gegnum þessi störf sem við erum að nefna. Ekki bara álver heldur flugverkefnið, sjúkrahúsverkefnið, gagnaverið og fleiri verkefni. Þá erum við að auka tekjur íbúa og það skilar okkur auknum skatttekjum. Þetta er leiðinn sem hægt er að fara og þetta er leiðin sem Ísland getur farið."