Wenger: 0,5 prósent líkur á því að Fabregas verði með á móti Hull

Það lítur út fyrir að Cesc Fabregas geti ekki spilað með Arsenal á móti Hull í ensku úrvalsdeildinni um helgina þar sem að spænski fyrirliðinn er enn að glíma við meiðsli aftan í læri.

Cesc Fabregas meiddist í sigurleik á móti Burnley um síðustu helgi og gat ekki tekið þátt í seinni leiknum á móti Porto í Meistaradeildinni á þriðjudaginn. Arsenal-liðið virtist þó ekki sakna hans mikið í 5-0 sigri.

„Eins og staðan er í dag þá mun Cesc Fabregas ekki spila leikinn á laugardaginn. Það eru bara 0,5 prósent líkur á því að hann verði orðinn góður þannig að það þarf kraftaverk til þess að hann verði með á móti Hull," sagði Arsene Wenger.

„Tomas Rosicky er að glíma við nárameiðsli og við munum ekki vita það fyrr en á föstudaginn hvort hann geti verið með í leiknum. Sagna tognaði líka á ökkla þannig að við þurfum að öllum 48 tímunum fram að leik til þess að gera menn klára," sagði Wenger.

Arsenal mun sakna annars miðjumanns á laugardaginn því Alex Song er í leikbanni í leiknum.