Park vill skora meira - ekki keyptur til að selja treyjur

Kóreumaðurinn Ji-sung Park segir það hafa verið stórkostlega tilfinningu að skora sigurmarkið gegn Liverpool um helgina. Ekki hafi skemmt fyrir að skora markið fyrir framan Stretford End.

„Nágrannaslagir eru sérstaklega mikilvægir leikir og að skora sigurmarkið í slíkum leik er einstök tilfinning. Að gera það fyrir framan Stretford End er ótrúlegt," sagði Kóreubúinn kátur en hann verður sífellt mikilvægari í stórleikjum liðsins. Hann skoraði einnig gegn AC Milan og Arsenal.

„Ég vil skora fleiri mörk fyrir United og mér er í raun sama gegn hvaða liðum. Ég veit ég á að skora fleiri mörk. Mér finnst eðlilega frábært að skora gegn stórum liðum eins og Arsenal, Milan og Liverpool en ég vil upplifa þessa tilfinningu oftar."

Þegar Park var fenginn til félagsins fyrir um fimm árum síðan þá héldu margir að það hefði eingöngu verið gert til þess að selja fleiri treyjur í Asíu. Sir Alex Ferguson, stjóri Man. Utd, segir það þó vera vitleysu.

„Ég vissi að hann myndi gera meira en að selja treyjur. Þegar ég sá hann í Meistaradeildinni með PSV árið 2005 þá hugsaði ég að þarna væri leikmaður sem skildi fótbolta. Hann er greindur knattspyrnumaður og agaður. Getur spilað í mörgum stöðum og ég efaðist aldrei um getu hans," sagði Ferguson.