Whelan: Vildi ekki leyfa Ramsey að sjá fótinn

Glenn Whelan, leikmaður Stoke City, var manna fyrstur að bregðast við þegar Aaron Ramsey fótbrotnaði illa um helgina. Whelan greip í Ramsey, lagði hann í grasið og reyndi allt sem hann gat svo Ramsey sæi ekki hversu illa hann hefði brotnað.

„Hann var eðlilega í vondu ástandi og við vildum fá læknana inn á völlinn sem fyrst. Hann vildi endilega horfa á fótinn sinn en ég var búinn að sjá hversu slæmt brotið var þannig að ég gerði allt sem ég gat til þess að forða því. Drengurinn var í losti," sagði Whelan.

„Ég sagði honum að hugsa um eitthvað annað og vera sterkur þar til sjúkraliðið kæmi á vettvang. Það var mjög erfitt fyrir mig að horfa upp á annan atvinnumann lenda í svona atviki og upplifa þetta mikinn sársauka. Þetta er eitthvað sem maður vill aldrei sjá en ég reyndi samt að halda honum rólegum eins lengi og ég gat."