Dregur úr notkun sýklalyfja

Á árinu 2009 dró úr sölu sýklalyfja og fjölda ávísana á sýklalyf miðað við árin á undan. Heildarsamdráttur í sölu sýklalyfja var 5,6%, sem er mun meiri samdráttur en í sölu lyfja almennt, sem nam 1,6%. Þetta kemur fram í nýjum Farsóttarfréttum, fréttabréfi embættis sóttvarnalæknis.

Ef litið er til fjölda ávísana sýklalyfja eftir aldri miðað við fjölda einstaklinga í aldurshópi hefur ávísunum í aldurshópnum 0-4 ára farið stöðugt fækkandi síðastliðin þrjú ár.

Fram kemur í fréttabréfinu að skýringar á samdrætti í notkun sýklalyfja séu ekki að fullu ljósar. Hafa verði í huga að sýklalyf séu almennt ekki niðurgreidd af hinu opinbera, sem kunni að leiða til minni notkunar lyfjanna. Einnig kunni að skipta máli aukin vitund um mikilvægi skynsamlegrar notkunar sýklalyfja meðal lækna og almennings.