Redknapp: Þetta verður rosalegur leikur

Harry Redknapp og lærisveinar hans í Tottenham sitja áfram í fjórða sæti ensku úrvalsdeildarinnar eftir 1-0 sigur á Bolton í dag. Tottenham hefur eins stigs forskot á Manchester City fyrir innbyrðisleik liðanna á miðvikudaginn.

„Við förum til Manchester City í góðum gír og það er allt undir í þessum leik," sagði Harry Redknapp en City vann 3-1 sigur á Aston Villa í sínum leik í dag.

„Þetta verður rosalegur leikur og þeir eru með frábært lið sem er að spila vel. Við höfum eins stigs forskot svo að við förum þangað með það í huga að fá eitthvað út úr leiknum," sagði Redknapp.

„Við getum tryggt okkur inn í Meistaradeildina með sigri og það er útaf svona leikjum að maður stendur í þessu. Við verðum tilbúnir í þennan leik. Þetta er búið að vera frábært tímabil og við eigum skilið að vera þar sem við erum. Við verðum bara að klára verkefnið," sagði Redknapp.