Skotárás í Bústaðarhverfi: Ung börn á heimilinu

Grunur leikur á að skotárásin í Ásgarði í Bústaðarhverfinu í gærmorgun tengist handrukkun en á heimilinu eru hjón með ung börn. Sex voru handteknir og fimm gistu fangageymslur vegna málsins og hefur verið krafist gæsluvarðhalds yfir þeim.

Lögreglan fékk fyrst tilkynningu um skotárásina í Ásgarði klukkan 11:41 fyrir hádegi í gærdag. Skotið var með haglabyssu á útidyrahurðina en á heimilinu eru tvö ung börn. Þau sluppu öll ómeidd. Sex voru handteknir, allir Íslendingar á þrítugsaldri, og var einum sleppt að lokinni skýrslutöku. Sérsveit ríkislögreglustjóra tók þátt í aðgerðunum.

Undir áhrifum örvandi fíkniefna

Grunur leikur á að um handrukkun hafi verið að ræða. Mennirnir, sem talið er að hafi verið undir áhrifum örvandi fíkniefna, voru handteknir á víð og dreif í kringum Ásgarð þar sem skotárásin átti sér stað. Einn lögreglumaður slasaðist og hlaut skurð í andliti þegar einn hinna handteknu sló hann hnefahöggi. Var hann saumaður á slysadeild Landspítalans. Sérsveit ríkislögreglustjóra aðstoðaði lögreglu við aðgerðina.

Í morgun um ellefuleytið voru mennirnir leiddir fyrir Héraðsdóm Reykjavíkur og krafist var gæsluvarðhalds yfir þeim. Hafa þeir allir fengið verjendur. Samkvæmt almennum hegningarlögum varðar húsbrot allt að eins árs fangelsi ef sá sem brot framdi beitti ofbeldi eða hótunum og ef það var framið af nokkrum í sameiningu. Einnig er til skoðunar brot á vopnalögum og lögum um ávana og fíkniefni. Ekki er grunur um rán, en mennirnir höfðu ekki með sér nein verðmæti. Nánar verður fjallað um málið hér á Vísi og í fréttum Stöðvar 2 í kvöld kl. 18:30. thorbjorn@stod2.is