Áhorfendur hafa valið bestu leiksýningar leikársins

Hin árlega uppskeruhátíð leiklistarinnar, Gríman, verður haldin hátíðleg í kvöld. Síðustu tvær vikur hefur staðið yfir netkosning um bestu leiksýningar leikársins að mati áhorfenda. Nú liggur fyrir hvaða fimm sýningar voru í uppáhaldi hjá áhorfendum í vetur. Það eru leiksýningarnar 39 þrep í uppsetningu LA, Faust í uppsetningu Borgarleikhússins í samstarfi við Vesturport, Fjölskyldan í uppsetningu Borgarleikhússins, Gauragangur í uppsetningu Borgarleikhússins og Skoppa og Skrítla í uppsetningu Borgarleikhússins. Símakosning stendur yfir fram á kvöld og verða úrslitin tilkynnt á Grímuhátíðinni sem fer fram í Þjóðleikhúsinu og verður sjónvarpað í opinni dagskrá á Stöð 2, segir í tilkynningu.

Símakosning stendur yfir og allir geta tekið þátt:

39 ÞREP - símanúmer 900 1201

FAUST- símanúmer 900 1202

FJÖLSKYLDAN - ÁGÚST Í OSAGE-SÝSLU-símanúmer 900 1203

GAURAGANGUR - símanúmer 900 1204

SKOPPA OG SKRÍTLA Á TÍMAFLAKKI - símanúmer 900 1205

Þrír heppnir þátttakendur í símakosningunni eiga þess kost að vinna árskort fyrir tvo í leikhúsið; Þjóðleikhúsið, Borgarleikhúsið og á sýningar Leikfélags Akureyrar.

Úrslitin verða kynnt í beinni útsendingu í lok Grímuhátíðarinnar á Stöð 2 í kvöld. Símtalið kostar 99 krónur.

Almennar tilnefningar til Grímuverðlaunanna 2010 voru kunngjörðar 4. júní og þá hófst kosning um áhorfendasýningu ársins.

Fimm sýningar hlutu tilnefningar sem sýning ársins; Djúpið í uppsetningu Borgarleikhússins í samstarfi við Strit, Faust í uppsetningu Borgarleikhússins í samstarfi við Vesturport, Fjölskyldan í uppsetningu Borgarleikhússins, Íslandsklukkan í uppsetningu Þjóðleikhússins og Jesús litli í uppsetningu Borgarleikhússins.

Grímuhátíðin, árleg uppskeruhátíð sviðslistageirans, verður haldin í áttunda sinn í Þjóðleikhúsinu í kvöld og hafa aldrei fleiri frumflutt sviðsverk komið til álita, en þau voru alls 89. Þar að auki komu 7 útvarpsverk til álita. Alls voru því frumflutt 96 verk á leikárinu 2009-10 sem fagnefndir Grímunnar skoðuðu með verðlaunin eftirsóttu í huga.