Wenger: Styttist í endurkomu Van Persie

Knattspyrnustjórinn Arsene Wenger hjá Arsenal hefur staðfest að framherjinn Robin Van Persie eigi ekki langt í land með að ná sér af ökklameiðslum sem hafa háð hann síðustu mánuði.

Van Persie hefur ekkert getað leikið með Arsenal síðan í nóvember en þá var hann búinn að skora sjö mörk í ellefu leikjum með Lundúnafélaginu.

„Það styttist í endurkomu Van Persie og ég myndi segja að það væri raunhæft að tala um byrjun apríl með það að gera. Ef allt gengur að óskum þá getum við notað hann á lokasprettinum í deildinni en auðvitað er alltaf erfitt að spá fyrir um svona lagað," sagði Wenger á blaðamannafundi í dag.