Sneijder ekki til Man. Utd. sem sýnir Balotelli áhuga

Wesley Sneijder fer ekki til Manchester United í sumar. Þetta segir félag hans, Inter Milan. Sneijder hefur verið einn besti leikmaður HM í sumar. Hollendingurinn á möguleika á að vinna einstaka fernu, ítalska bikarinn, ítalska meistaratitilinn, Meistaradeildina og heimsmeistaratitilinn fyrstur manna. Hann var orðaður við United í vikunni en forseti Inter segir hann einfaldlega ekki til sölu. United ætlaði að bjóða um 30 milljónir punda í Sneijder. "Áhuginn frá United er till staðar, en ég skoðaði það ekkert sérstaklega. Ég er að horfa á Sneijder á HM og mun gera það hjá Inter næstu ár," sagði Moratti að því er fram kemur hjá Guardian í dag. Hann staðfesti einnig að United hefði sýnt Mario Balotelli áhuga, ásamt fleiri félögum, meðal annars Manchester City.