Ray Wilkins: Hættið að baula á John Terry

Ray Wilkins, aðstoðarstjóri Chelsea, segir að það sé alveg kominn tími á það áhorfendur hætti að baula á fyrirliða liðsins, John Terry.

Terry hefur fengið óblíðar móttökur frá stuðningsmönnum mótherja Chelsea í öllum leikjum síðan að komst upp um framhjáhald hans og fyrrum kærustu Wayne Bridge.

„Ég tel að það sé alveg kominn tími á að hætta þessu bauli á hann. Skilboðin eru komin til skila fyrir löngu," segir Ray Wilkins.

„Terry þarf samt enn að hlusta á þetta baul en hann heldur bara áfram að spila sinn leik og skila sínu til liðsins," segir Wilkins.

„Ég er ekki sáttur við þessa meðferð en ég get ekkert gert. Terry tekur á þessu á þann eina hátt sem hann getur - með því að standa sig inn á vellinum," sagði Wilkins og hrósaði Terry fyrir frammistöðuna um helgina.